又一個港人回憶消失了，雖然近年 UA 已不斷萎縮，而光顧得最多的沙田UA 6和金鐘UA，其實一早已經不存在了，但對於這間超過30年歷史的戲院消失，還是感到可惜！
大家都應該反思，怎樣的政策才可在防疫和民生中保持平衡！眾多受疫情影響的行業之中，戲院是最無辜的！第一，睇戲不用除下口罩，第二，睇戲可以隔行坐（都係唔放心咪再隔疏啲囉！），第三，記憶中並沒有人因為去睇戲而中招！但在政府一聲令下，戲院還是被迫停業一段長時間，真係唔抵！
也不要跟我說全部都係講科學，假如戴晒口罩又有社交距離都唔得，咁其實返工都唔得啦！假如睇戲會引致人群聚集，咁返工坐港鐵又得？假如怕出現群組，咁地盤爆咗咁多鑊，又唔見你封晒全港地盤？
現在的問題是，由公務員和醫學「專家」決定哪些可營業哪些不可，他們都會傾向從嚴，不！正確地說，傾向無牙人的行業從嚴！因為嚴厲措施之後疫情下跌（其實沒有嚴厲措施，疫情都可能下跌架），他們便成為「抗疫功臣」，嚴厲措施下導致大量公司結業，對他們是沒有影響的，他們仍然糧照出。在這種「畸形」的情況下，官員和「專家」自然寧枉莫縱，你死你事，最重要我要攞光環，這根本就是另類「道德風險」吧！
