有關大家樂燒鵝飯的二三事

1.有香港餐廳用簡體字，有人高呼要文化包容，有人高喊餐廳有用文字的自由；到大學樂賣五十蚊燒鵝髀飯或七十蚊燒鵝髀飯，大家又忘記包容和自由了。大家樂既非壟斷市場，也非拿著槍逼大家幫襯，不喜歡大可光顧另一家，更何況，大家樂事先已講明價錢，絕非打死狗講價，有何不可？

2.大家樂賣五十蚊燒鵝飯，大家嫌貴所以鬧，但如果大家樂賣五蚊燒鵝髀飯，又有人話大集團以本傷人了，但如果大家樂跟大快活美心一樣賣三十五蚊（當然以上價錢只是例子），仲大鑊，豈非合謀定價，犯了將來的反壟斷法，咁你叫人哋點定價先啱？

3.有人話大家樂無理由賣得貴過鏞記，點解唔得？邊條法例話唔得。首先，兩者分量未必一樣，根本無很比，第二，邊個話鏞記一定好食過大家樂？第三，就算鏞記真係好食，我住喺天水圍，唔通專程坐車去中環食？所以無論鏞記定乜價錢，同大家樂定價有乜好比？

4.而家網民發功，逼使大家樂不再推出燒鵝髀飯，有網民又自我感覺良好，覺得係小市民的勝利，呸！大家樂又不是大減價，以前吃不起的，現在一樣無得食，但偶爾有人有錢剩，想吃好些慰勞自己的，現在想吃都無得吃，網民還認為是勝利？難道香港人惡到自己吃不到連人家也不准吃？