奧運會與殘奧會

張家朗贏得奧運金牌，成為李麗珊之後第二位奪得奧運金牌的運動員，但這個世界總有些人無事找事做，擺出一副「眾人皆醉我獨醒」的態度，堅稱李麗珊之後，蘇樺偉也拿過殘奧會（又稱帕運會）的金牌，質疑指張是香港第二位奧運金牌得主是「歧視殘疾」，我真係吹到啤一聲！

其實網上已有人反駁那條友，指蘇樺偉之前還有張偉良及其團體隊友，假如堅持要計算殘奧會成績，那人又是否「歧視」張偉良？

但個人認為，奧運會就是指夏季奧運會，而不包括冬季奧運會及殘奧會，這是一般人的共識。正如我問大家，連同今屆，日本總共主辦了多少屆奧運，相信大家都會答是兩屆，難道我又開個Po話日本舉辦過四屆奧運呀（即1964年東京奧運會、1972年札幌冬季奧運會、1998年長野冬季奧運會及2020年東京奧運會），大家話兩屆係「歧視冬季運動員」？

又正如巴西贏過5次世界盃足球賽冠軍，假如有條茂利走出來講：「唔係呀！巴西贏過10次冠軍呀！十一人賽贏過5次，五人賽贏過5次，大家做乜歧視五人足球賽球員呀？」你會唔會覺得嗰條友傻架！（如果係要拗，10次都係錯嘅，因為仲有沙灘足球世界盃，懶得數巴西贏過幾多次）！

本人非常尊敬蘇樺偉及其他傷殘運動員，但殘奧會就是殘奧會，並不是奧運會。而這個世界實在有太多人喜歡在道德高地上指責別人，甚麼都上綱上線至「歧視」，這是最恐怖的！